June 13 (Zirtawpni) Lengpui Airport chu lungleng nghal em em in kan pan a, Airport kawtah chuan Rossi-a kan call a, vawi khat inhmuhna tur ni bawk nen ka bul lawk bawlhhlawh bawm bul atang chuan min lo chhang a. Flight delay vanga kan thut lai chuan ring lutuk tak maia nui ri lam chu kan hawi a, Mary (Aizawl Venglai) eitur a thlawna an sem chu lak hman loh hlau em em hian a lo tlan phe dawr dawr a, Flight an cancel tak avangin ni 16 ticket chu ka la ta.
June 16 (Thawhtanni) Lengpui Airport lam panin kan tlan thla leh hnak hnak a, hmelhriat sa Kima (Under 14 Electric Veng Football Club keeper thin), Thantea (Electric Veng Presbyterian Kohhran Upa fapa), Msa (Electric Veng Henry Varte an tih mai), Ctea (1992 kum vela kan kawmthlangpa) leh mipakhat sam in seihleih, Electric Guitar ak hnuang mai hi awm tel bawk a, Kima’n min han hmelhriat tira 2008-2009 MSYM Sport & Cultural Secretary Lalhriatpuia nia, a in zuahbuk lutuk kha sakhaw mumal nei lo tan chuan biak tham hial ani ti ila dawt kan sawi lo in ka ring. Kolkata kan thleng chu Mumbai Flight an lo Cancel a, Hriatpuia (Saminseihleih) leh midang chuan an buaipui hnu chuan Pathian zarah Kolkata to Mumbai via Delhi kan hmu hlauh a, VIP takin kan rawn chuang thla ve lawp lawp a. Kan chuanna a bir zawngin second 8 vel an awm chu Hriatpuia (Saminseihleih) leh Kima kan en a, unau ni awm tak hian an lo in kuah rial a, Thantea pawh hmalam pang en in lo meng puau puau bawk a, ruahsur karah Mumbai kan tuma, a boruak lum viau tura ka rin laiin a lum lutuk hranpa lo khawp mai.
Airport kawt ah chuan in bial lianpui mai pawl phet hi a lo ding a, Thantea’n an Hostel lam ah min liam san a, Kima leh Saminseihleiha te nen an Hostel lam panin kan phei a, ka thutpui te an fing var bawk a kan sir a in thenkhatte, veng hming te an sawi a, Car manto ner awmna te ka hriatphah hial a ni. Hostel kan han thleng a, sazu lian tawk zawhte tiat leng lawng hi rawn zuang phei tau tau maia, sazu rap chi lo nih bawk nen awm chu nuam lo khawp mai. Lift te reuhte ah chuan kan in hnawh rap rap mai a, Hriatpuia an tih kha a in ti te hlauh vangin kan leng hram a, room kan luh chuan khum 3 hi lo awm a, a nuam lai ber an almirah hnuaiah chuan min mut tir ta a.
June 17 (Thawhlehni) zing dar 11 vel ah kan tho tham tham a, vawikhat nan Bombay ah ek kan hnutchhiah ve hnu in inbual a, ka’n dak chhuak chu tui pui hi lo fawn hlup hlup mai a- nakina lunglatileng tur ani tih hrie miah loh chuan ka thlir a, a rim erawh atui hran lo. Kan hawi kual vang vang chu zawhna hlir hian ka khat a, thleng thar nih vang nge ni thil engkim mai hi hriat ka duh a. Chhun chaw nge zing chaw tih pawh hriat loh chu kan ei a, sim card min lei pui rualin chak khai kan lam nghal a. Hriatpuia(Saminseihleiha) chuan an KTP function-a Miss an ti lai vel chu laptop ah kan hmuh loh hlau em em mai hian ring tawkin a chhuah a, thian kawm nuam ti mi tih a hriat nghal a. Tlai dar 4 vel ah kan thenawmnu Emeline-i rawn kal a, ka awmna tur Rossi-a bulah chuan kan phei a, Thantea Hostel awmnate min kawh hmuh a, thim dawnah kan va thleng a. Min thlahtute chu kan thlah chhawng veleh a, in kan thlen hnu lawk ah Josepha lo hawng a, rei lo te hnuah nula 2 hian an rawn len chilh ta tlat mai a, Joseph-a chu zei hle dawn ni maw tih rilru ah lo awm a, a hnu zelah pawh ka ring sual lo khawp mai.
